DÎVÂN-I FİRÂK-I ESÎRÎ

Esįrį Fermāyed 

[Gazel 91]

Bir gice tā śubĥ olınca cānum aŋdum aġladum

Yana yana fürķat ile cānum aŋdum aġladum

Bāġ bustānda dem-ā-dem Ǿişret idüp yār ile

Źevķ u şevķ ile śafā seyrānum aŋdum aġladum

Rūz [u] şeb yārān ile śoĥbetler idüp dāǿimā

Ol ezelki itdügüm devrānum aŋdum aġladum

Ġurbet iķlįmine düşdüm ayrılup yārdan dirįġ

Ĥasret ile āh idüp efġānum aŋdum aġladum

Bį-kes ü bį-çāredür şimdi Esįrį dostlar

Mıśr-ı dil Yūsuf ya'nį Ken'ānum aŋdum aġladum

Esįrį Fermāyed

[Gazel 93]

Āh ezelki demleri devrānı aŋdum aġladum

Gözlerümden yaş aķup yārānı aŋdum aġladum

Ĥasretā bu nār-ı fürķat yaķdı cān u cigerüm

Seyl olup gözden aķan bārānı aŋdum aġladum

Ķanı şol demler k’iderdük dostlar ile śoĥbeti

Anlar ile itdügüm seyrānı aŋdum aġladum

Vaŧanumda şevķ ile çün şādumān idi göŋül

Ġama düşdi bu dil-i vįrānı aŋdum aġladum

Çoķ cefā ķılduŋ bize [sen] ĥadden aşdı iy felek

Ĥaddi yoķ ġāyātı yoķ oranı aŋdum aġladum

Esįrį Fermāyed 

[Gazel 110]

Kimseden hįç görmedüm mihr [ü] vefā dünyāda ben

Şāźlıķla sürmedüm źevķ u śafā dünyāda ben

Şol ķadar ġurbetde itdüm āh u zār ile fiġān

Giçdi ömrüm gülmedüm hįç bį-vefā dünyāda ben

Anca yıllar anca aylar anca günler anca ān

Śad hezārān görmişem cevr ü cefā dünyāda ben

Tende ŧāķat cānda rāĥat dilde ārām ķalmadı

Niçe yüz biŋ çekmişem derd ü belā dünyāda ben

İy Esįrį ĥażret-i Ĥaķ eyleye dermān saŋa

İns ü cinden bulmadum derde devā dünyāda ben

Esįrį Fermāyed 

[Gazel 160]

Bu dünyā bį-vefādur yoķ vefāsı

Ŝebātına inanma yoķ beķāsı

Yüzüŋe gülse eger bir iki gün

İrişür nā-gehān hicrān belāsı

Seni maġrūr ider bu çerħ-i ġaddār

Yalancı pįre-zendür yıķılası

Eger bir laĥža ide şād u ħurrem

Ki Ǿömrüŋce olur anuŋ ķażāsı

Esįrį sen göŋül virme cihāna

Öŋi vįrān śoŋı vįrān olası

Esîrî

Kİ AZRAİLE BĀRİ EYLE FERMĀN BU ARADAN BİZİ GELSÜN ÇIĶARSUN

Ķuluŋ işi güci dāǿim ķuśūrdur

Senüŋ ismüŋ ile şānuŋ ġafūrdur

Baġışla śuçumuzı luŧfuŋ ile

Daħı ķurtar Ǿaźābdan fażluŋ ile

Ǿİnāyet ķıl bize sensin teālā

Ħalāś eyle belādan yüce Mevlā

Żaįf ü dil-şikeste ħasteyem ben

Naĥįf ü beste vü dem-besteyem ben

Dükendi gözlerümden yaş ile ķan

Gözüme uyħu gelmez oldı bir ān

Dün ü gün zārilıķla dirüm Allāh

Giçüpdür ömrimüz āh ile her gāh

Bilüm bükildi kaddüm nūn oldı

Gözüm giryān ü baġrum ħūn oldı

Bilürsin yā İlāhį sen firāķum

Dil ile şerĥ olınmaz iştiyāķum

Nedür bilmem ki bu derdüŋ Ǿilācı

Ki hįç yoķdur cihānda bundan acı

Cihāna ķopısar bir gün ķıyāmet

Bizüm başumıza her gün ķıyāmet

Adūnun cevri žulmi cāna giçdi

Daħı ķahrı vü zehri ĥadden aşdı

Ne cevr itdi cihānda baŋa düşmen

Ħuśūśā kim bilürsin saŋa düşmen

Benüm ĥālüm saŋa rūşen degül mi

Benüm seyrānuma il şen degül mi

Disem ġayrılara ĥālüm ĥikāyet

Ki ķorķaram idem senden şikāyet

MuǾįn ismüŋ bize dāfiǾ degül mi

Ġażabdan raĥmetüŋ vāsiǾ degül mi

Eger derdimüze olmazsa dermān

Ki Azrāile bāri eyle fermān

Bu aradan bizi gelsün çıķarsun

Girüsin yaķ bizi çünkim yaķarsın

Aźāb itme bize kāfirler ile

Ki alma cānumuz kāfir eliyle

Çü sensin itdüren düşmāna cebri

Sen iĥsān eyle bāri bize śabrı

Getür altunı dir zindān içinde

Bitür ħūnı yiyem dir nār içinde

Ki zindān içre hįç altun olur mı

Yanar külħān içinde ħūn olur mı

Kişi zindān içinde śuya muĥtāc

Yaturlar ķuru yirde çıblaķ u ac

Bu maķūle belāya śabr olur mı

Ki bundan özge cānā cebr olur mı

Revā mı zārį zārį aġlayam ben

Yanar āteşle baġrum ŧaġlayam ben

Müyesser olmaz ise baŋa seyrān

Ki itme yirümüzi bāri nįrān

Bu bį-çāre Esįrį derdmendi

Ħalāś it bį-mecāl ü müstmendi

Esîrî